LEGAZPI CITY- Nagtetenir na matrangkilo an sitwasyon sa Canada sa ibong kan anunsyo ni Canadian Prime Minister Justin Trudeau na pagdemitir sa pwesto bilang lider ng Liberal Party.
Segun ki Bombo International Correspondent Ruth Marie Magalong na pigrerespeto man kan mga namamanwaan sa nasabing nacion an desisyon kan opisyal.
Antes ini nangapudan an mga lider kan tulong darakulang mga provincia sa Canada sa pagbubutas sa pwesto ni Trudeau sa tahaw kan mga kontrobersiya na pigkakahampang kaini.
Napag-araman na magin an nagkapirang partymates kaini sa Liberal Party an enot na man na nangapudan kan pagbaba kan Prime Minister sa pwesto.
Katakod kaini, magigin suspendido man an parliamento sa Canada hasta sa Marso 24 hasta sa makapag ilehir na nin bagong lider.
Marurumduman na enot na man na nagpatanid si US President elect Donald Trump na magpapataw nin mas halangkaw na taripa sa mga produkto hali sa Canada asin pagtuyaw kaini sa pirilian.
Segun ki Magalong na posibleng saro ini sa mga rason kaya magin an mga kapartido ni Trudeau an nakisumaro na sa mga pangapudan.
