LEGAZPI CITY- Pinahimutikan kan sarong lehislador an mga alegasyon na nagkaigwang “singit-singit” sa ipigubusol na P3.757-trilion 2019 national budget makalihis na makapasar sa ikatulo asin huring pagbasa sa Kamara kan Martes.
Sa intrevista kan Bombo Radyo Legazpi ki Ako Bicol Party-list Representative Alfredo Garbin Jr., trabaho kan hibabang sanga kan Kongreso na himayon asin busision an mga laog kan proposed national budget.
Inasegurar sana suboot kun magigin responsive an mga naka-itemize na financial plan sa pangangaipo kan mga constituentes asin nakabase sa trabaho kan kongresista an ginibong realignment.
Pagklaripikar pa ni Garbin na pigtutugutan sa irarom kan recent decision sa Korte Suprema an pag-scrutinize an pagagamitan kan ipigsumitir na budget ni Presidente Rodrigo Duterte alagad dae pig-aaprubahan an post enacted intervention.
Ipigdistribuer na man sa mga rehiyon asin provincia an napag-araman na P50-billion na pondo na nakakonsentrar sana sa nagkapirang lugar kun sain pighihiling na mabebenipisyaran an mga programa sa imprastraktura, patinampo, health facility asin classrooms.
Sa presente, ipigpapasa na kan Kamara an bola sa Senado kun sain piglalaomang aabuton nin tulong semana an scrutiny sa nasabing sanga asin maipapasar an adoption o amendments para sa third and final reading antes an Christmas break.
