LEGAZPI CITY – Ipigdoon kan sarong weather specialist na an shearline an pinakarason kan mga pag-uuran na na-eksperyensyahan sa manlain-laing provincia kan rehiyon Bicol.
Segun kay Christian Allen Torevillas sa intrevista kan Bombo Radyo Legazpi na laoman pa an makukusog na pag-uuran hasta sa mga masunod na oras asin aldaw partikular na sa provincia kan Albay.
An shearline suboot, an sarong weather system kun sain nagsasabatan an paros kan amihan asin an paros sa dagat pasipiko asin nagkakaigwa nin mga mapanganuron na kalangitan.
Base man sa saindang latest monitoring na hasta sa Enero 12 magigin maraot pa an kamugtakan kan panahon sa rehiyon asin posibleng sa masunod pang semana mamatean an maray na estado kan panahon sa rehiyon.
Magigin mas halangkaw man an maiirehistrong pag-uuran kaysa sa normal na mamatean sa provincia ngunyan na bulan hasta sa bulan nin Mayo.
Pigtaram pa ni Torevillas an nakaaging Disyembre 2024, may namamatean na an provincia nin La-niña like condition asin nahihiling sa mga climate models na halikpot sana ini asin matapos sa bulan nin Pebrero o Marso.
Pangapodan kan eksperto sa publiko na permihang mag-antabay sa mga state weather bureau nganing maaraman kun ano an kamugtakan kan panahon sa rehiyon kan Bicol.
