LEGAZPI CITY – Ipigdoon kan sarong weather specialist na an shearline an numero unong rason kan mga pag-uuran na na-eksperyensyahan sa manlain-laing provincia kan rehiyon Bicol.
Segun ki Christian Allen Torevillas sa intrevista kan Bombo Radyo Legazpi na magdadara an nasabing raot nin panahon nin heavy to intense rains sa Masbate, Albay asin Sorsogon, mantang moderate to heavy rains man sa Camarines sur asin Catanduanes.
Posible man suboot digdi an pagbaha partikular na sa mga low lying areas asin hararani sa dagat mantang pagrasay man nin daga para man sa mga kabuludang parte kan rehiyon.
An shearline suboot, an sarong weather system kun sain nagsasabatan an paros kan amihan asin an paros sa dagat pasipiko asin nagkakaigwa nin mga mapanganuron na kalangitan.
Pigtaram pa kaini na pwedesir na magbago an weather outlook alagad pigpapahiling kan saindang mga weather models na magigin mauran an panahon hasta sa weekend.
Sa presente, may piglalaoman alagad igwa sana ining hibaba na tyansa na may mabilog na bagyo sa laog kan Philippine Area of Responsibility.
Pagirumdom ni Torevillas sa publiko na ipadagos an pag monitor sa kamugtakan kan panahon mantang mag-ingat sa mga pagbabaha asin pagrasay nin daga na pwedesir ikawsa kan warang patod na pag-uuran na dara kan shearline.
