LEGAZPI CITY-Nahahampang si Sen. Ronald “Bato” Dela Rosa sa sarong ethics complaint makalihis suboot na dai mag-atendir sa mga sesyon kan Senado kan labi tulong bulan.
Nagsangat nin pormal na reklamo an anti-corruption group na “Wag Kang KuCorrupt” sa Senate Committee on Ethics and Privileges.
Iginiit ninda na haloy nang dai naglalaog an senador na maikokonsiderang “dereliction of duty” asin pag-abuso sa tiwala itinao sa saiya kan publiko.
Segun sa grupo, bako katanggap-tanggap na padagos na nakakaresibe nin kompensasyon hale sa kaban kan bayan an sarong opisyal kan gobierno kun dai ninda piggagampanan an saindang mandato.
Ipighayag man ni dating Sen. Antonio Trillanes IV na masangat siya nin ethics complaint laban kay Dela Rosa huli sa haloy nang dai nagpapahiling ini sa Senado.
Susog sa mga report, pagoolayan kan Senate Committee on Ethics and Privileges sa masunod na semana an reklamo laban kay Dela Rosa ngani matukoy kun bastante an batayan para sa mas hararom pang imbestigasyon.
Marurumduamn na dai na nagpahiling sa publiko si Dela Rosa poon pa kan Nobyembre 2025, kasunod kan mga report na siya iimbestigaran kan International Criminal Court.
