LEGAZPI CITY-Binatikos ni Senate Blue Ribbon Committee Chairman Rodante Marcoleta an suboot mga palpak na pagkakagibo kan sarong revetment project na pinondohan nin bilyong piso kan gobierno.
Sa ipigsasagbiong pagorolay, ipighayag ni Marcoleta na 80% kan revetment an gibo sana sa mga daga, 15% na semento, mantang an 5% sana an mga bakal asin mga materyales kung sain harayo sa piglalaoman na mga kalidad nin proyekto.
Napag-araman man na an contractor kan nasambitang proyekto an St. Timothy Construction, na pagsadiri kan pamilya Discaya.
Pinangaranan man ni President Ferdinand Marcos Jr. an 15 kumpanya bilang igwang mga pinakadakulang flood control contracts sa gobierno asin 8 digdi an dai nagatendir sa imbitasyon sa komite.
Afuera sa St. Timothy Construction, kairiba sa mga contractors na pinangaran an Alpha & Omega General Contractor & Development Corporation, Topnotch Catalyst Builders Incorporated, Sunwest Incorporated, Hi-Tone Construction & Development Corporation, Royal Crown Monarch Construction & Supplies Corporation, Wawao Builders, asin L.R. Tiqui Builders Incorporated.
Mientrastanto, pigiimbestigaran pa kan Senate panel an mga iregularidad mapadapit sa flood control projects.
