LEGAZPI CITY-Sinigurado ni Senate President Sherwin Gatchalian na lubos nang preparado an impeachment court saaga, Hulyo 6, para sa enot na aldaw kan impeachment trial ni Bise Presidente Sara Duterte.
Sinabi ni Gatchalian na an impeachment court natapos na an mga preparasyon sa logistical asin seguridad para sa proceedings.
Nagpaluwas man suboot an senado nin anom na set nin guidelines, kabali na an seguridad, media access, asin an paghiro kan mga senator-judges sa laog kan senado.
Magin an pre-trial orders asin iba pang opisyal na dokumento pig-upload na sa website kan Senado sa ngaran kan transparency.
Pinaglalaoman na an mga testigo na mahampang sa Martes.
Pigtugutan suboot kan senate rules si Bise Presidente Sara Duterte na magpadara nin representante kun dae ini makakaatendir sa proceedings.
Piglinaw ni Gatchalian na dae pa napag-olayan an mga kinakaipuhan na boto nganing ma-convict an Bise.
Mientrastanto, preparado man an House prosecution panel para sa impeachment kontra ki VP Sara.
An prosekusyon asin depensa piglalaoman na matao nin mga pambukas na pahayag, kun saen an impeachment court an mabugtak kan mga patakaran asin madesisyon sa apat na mosyon na isinangat kan panel kan prosekusyon.
Kabale digdi an pagbukas kan BIR box, an paggamit kan tataramon na Ingles asin Filipino, asin pagtugot sa mga public asin private prosecutors na mag-cross-examine sa mga testigo.
