LEGAZPI CITY — Padagos man giraray an pagtatao nin seguridad kan Albay Police Provincial Office makalihis an Semana Santa.
Sa intrevista kan Bombo Radyo Legazpi ki Pol. Col. Wilson Asueta, provincial director kan Albay PPO, yaon man giraray police visibility, intel monitoring asin mga nakadesignar na mga pulis para sa road safety urog na ngonian na eleksyon.
Sienerto ni Asueta na ise-secure an polling centers, ma-escort sa pag-transport kan Vote Counting Machines (VCM), asin durante kan eleksyon, ise-secure man an vital installation.
Sinabi pa kan opisyal na matao man nin area security durante kan campaign rally kan mga kandidato.
Mientras tanto, nakapagkumpiskar na an Albay PPO nin 25 assorted firearms durante kan checkpoints, asin iba pang operasyon siring kan Oplan Sita, Oplan Bakal asin search warrant operations.
Afuera kaini, nakapagsurendir man nin 158 manlain-lain na armas na nasa kustodiya kan mga hepatura kan pulis sa paagi kan Oplan Katok.
