LEGAZPI CITY- Sienerto kan Legazpi PNP sa pangengenotan kan hepe kaini na si P/SUPT Nilo Berdin an seguridad para sa papaabot na Palarong Bicol 2017.
Sigon ki PSUPT Berdin, makalihis an mga meeting na saindang ipigsagibo kaibanan an manlaen-laen na ahensyang katakod kan sporting event, nakabilog na nin security plan na nasa finishing stage na ngunyan.
Nakipagkoordinar na suboot sinda sa Bicol PNP ngani na maghagad nin dugang na security personnel na io-augment sa mga billeting areas asin playing venues.
Pig-eksplikar kan hepe na dae kaya pwedesir na masakripisyo an mga regular na operasyon kan saindang unit kun kaya kaipuhan nin staff augmentation gikan sa regional office kan ahensya.
Napaisi na man suboot ninda an manlaen-laen na delegado na magdara nin maski 8 police personnel gikan sa kanya-kanyang probinsya.
Katakod kaini, sinabi ni Berdin na nakikipagtabangan na man si Albay PNP Provincial Director PSUPT Antonino Cirujales sa saiyang mga counterparts.
Ididisignar suboot an 8 pulis na kaibanan kan lambang delegado sa mga billeting centers mantang igwa man nin ibang grupo na idi-deploy para sa mga playing venue.
Piglalaoman na labi sa 200 na PNP personnel an ipapalakop para sa event apwera pa sa augmentation gikan sa Pwersa Armadas kan Pilipinas.
Sa ngunyan, sinabi ni Berdin na pigsasapinal pa ninda an kumpletong listahan kan augmentation personnel na kaipuhan para sa taon-taon na patiribayan sa manlaen-laen na sports kan 13 dibisyon kan mga pampublikong eskwelahan sa elementarya asin hayskul sa Bicol.
