LEGAZPI CITY – Naghahanda na an Legazpi City Schools Division Office para sa paghost kan ciudad sa paparaning palarong bikol sa maabot na Marso 2025.
Segun ki Legazpi Schools Division Office head Francisco Dexter Sison sa intrevista kan Bombo Radyo Legazpi na nagkondusir na sinda nin school board meeting asin napag-olayan na an gabos mapadapit sa naunambitang pakawat.
Nagkaigwa na man sinda nin regional accreditation for officiating officials para sa mga mawot mag referee sa mga sporting events.
Wara pang pinal na eksaktong petsa kun nuarin mapoon an pakawat nin huli ta pigsyer-syerto muna ninda na warang matatamaan na mga aktibidad sa mga eskwelahan sa ciudad.
Pigtaram pa kan opisyal na aasikasuhon kan Legazpi City Local Government asin Unit City Engineers an mga playing venues asin billeting centers kan mga teteniran kan mga delegado na gikan pa sa manlain-laing provincia kan rehiyon bikol.
Mapirma man sinda nin agreement sa pagultangan ninda kan Bicol University nganing magamit an Albay provincial sports complex para sa athletics asin swimming event.
May mga ihahanda man sinda nin mga medical team sa mga playing venues nganing masyerto na tulos sindang makakatao nin asistensyang medikal sa mga parakawat kun kinakipuhan.
Hagad kaini sa publiko na ipangadyi an pagigin salbado asin matuninong na pagdadaos kan ciudad nin legazpi sa palarong bikol nin huli ta digdi maaaraman kun siisay an mga ilalaban kan provincia para sa palarong pambansa.
