LEGAZPI CITY- Nagkukundusir ngunyan nin screening an accreditation committee kan Department of Education (DepEd) Bicol sa mga medalists kan nakalihis na Palarong Bicol 2017.
Ini ngani na magpili nin mga kwalipikadong atleta na ma-representar sa Bicol sa Palarong Pambansa 2017 na isasagibo sa San Jose de Buenavista, Antique sa bulan kan Abril.
Sigon sa tagapagtaram kan DepEd Bicol na si May Jumamil, mapili an nasambitan na komite sa labi sa 400 na medalists bilang preparasyon sa nasambitan na national sporting event.
Aminado si Jumamil na kadaklan sa mga mapipili, iyo an mga atleta gikan sa dibisyon kan kampeon na Camarines Sur alagad igwa man giraray nin mga mapipiling matitibay na atleta gikan sa ibang team.
Sa ngunyan, naghahanda na man suboot an rehiyon para sa mga dugang na event sa Palaro arog kan demo sports.
Piglalaoman na maipi -presentar an kumpleto asin pinal na listahan kan mga malaban sa Palarong Pambansa sa masunod na semana.
