Sarong lalaki an binawian nin buhay mantang saro pa an irido makalihis na makuryente sa Pamplona asin Nabua, Camarines Sur.
Binisto an nagadan na si alyas Wilson, 42 anyos, residente kan Brgy. Burabod, sa banwaan nin Pamplona, mantang an nairido iyo si Alias Angelo, 40 anyos, residente kan Barangay Santiago Old, Nabua, sa nasambitan ng probinsya.
Sa intrevista kan Bombo Radyo Naga ki PCPT Monica San Juan, Acting Chief of Police kan Pamplona Municipal Police Station, sinabi kaini na mantang may pig-aayos an biktima na si Wilson sa saindang atop kan matumba ini asin aksidenteng makabangga sa linya kan kuryente kan CASURECO II.
Nahiling tulos ini kan saiyang pamangkin asin naghagad nin tabang sa saiyang mga kapamilya.
Dinara pa sa ospital an biktima alagad idineklarar ining dead on arrival kan doktor.
Dae man nin intensyon an mga parientes kan biktima na magsangat nin kaso contra sa CASURECO II, urog nang inosente an cooperativa asin inaako na aksidente sana an nangyari.
Mientrastanto, saro pang lalaki an irido sa Nabua, Camarines Sur makalihis na makuryente.
Sa impormasyon kan Camarines Sur Police Provincial Office, nahiling kan kataid na harong an biktima na nakahandusay sa maawot na parte kan Barangay Santiago Old sa banwaan makalihis na madangog an pagsabog kan sarong transformer kasabay kan pagkawara kan supply nin kuryente.
Tulos man na nagresponde an Nabua MDRRMO asin an mga pulis asin dinara sa ospital an biktima, kun saen ini nagpaparahay ngonian.
Kasunod kan insidente, nagpagirumdom si San Juan sa publiko na mag-ingat asin hilingon an saindang palibot, urog na kun may mga linya nin kuryente sa harani, nganing maibitaran an kaparehong insidente.
