Sarong lalaki, arestado sa isinagibong buybust operation sa Sorsogon City

LEGAZPI CITY – Karsel an bagsak kan sarong lalaki sa isinagibong anti drug operation kan mga kapulisan sa provincia kan Sorsogon.

Segun ki Sorsogon City Police Station Chief of Police, Police Lieutenant Colonel Christopher Aduviso sa intrevista kan Bombo Radyo Legazpi na binisto an suspetsado na si alyas “wil” asin nasa tamang edad na.

Nakuwa sa suspetsado an tulong sachet kan pinagtutubudang shabu na pigkakarkulong 0.5 grams na gabat asin nagkakantidad nin poco mas o menos dos mil de pesos.

Haloy na suboot na pigmamanmanan kan saindang ofisina an suspetsado huli ta pigkokonsidera ninda ini bilang sarong high value target.

Maski nasa watchlist ninda an suspetsado, aminado an opisyal na dakulang tabang an partisipasyon kan mga nasa komunidad asin mga barangay official nganing masawata an mga ilegal na aktibidad.

Isinagibo man suboot an operasyon sa pakikipagtabangan kan saindang ofisina sa Provincial Drug Enforcement Unit kan Sorsogon Police Provincial Office kaiba an 1st Provincial Mobile Force Company, asin Philippine Drug Enforcement Agency Region V.

Pagdoon niya man na dapat tulos na makipagkoordinar an mga barangay official kun enkaso may namonitor na nagpapabakal o naggagamit nin elegal na droga nganing matawan nin aksyon asin nganing mamantenir an pagigin drug cleared barangay asin ciudad.

Mientrastanto, pighayag man ni Aduviso na nasa kustodiya na kan Sorsogon City Police Station an suspetsado asin susunadan nin kasong pagbayolar sa Acta Republica numerado 9165 o Comprehensive Dangerous Drugs Act of 2002.