LEGAZPI CITY- Pigrespondehan kan Daraga Public Safety Office an insidente nin kasulo imbwelto an sarong kotse sa may parte kan Regidor St. sa banwaan kan Daraga, Albay.
Segun kay Lorenzo Bañas, an tagapagtaram kan PSO Daraga sa intrevista kan Bombo Radyo Legazpi, tulos na pigrespondehan kan saindang personahes an nasusulong kotse makalihis na igwang concerned citizen an nag-impormar sa sainda dapit sa insidente.
Segun pa sa opisyal nagbaba suboot an driver kan puting kotse para magbakal sa tindahan alagad dae kaini pinalsok an makina kan saiyang behikulo rason kan pagkakaigwa nin usok sa laog kan nasabing kotse.
Katuwang an PNP asin PSO personnel, ginamitan ninda nin fire extinguisher an nasusulong kotse para maapula ini.
Pigkakarkulong nag overheat an nasabing behikulo kun kaya bigla ining nag usok.
Mientrastanto, pigpapasalamat man kan PSO na dae nagsabog an kotse huli ta kun enkaso suboot na nagsabog ini an dakol na establisyemento an madadamay.
Sa ngunian pig-iimbestigaran na kan Bureau of Fire Protection Daraga an kawsa kan nangyaring insidente.
Pangapudan na sana kan opisual sa mga drivers na kun magpaparking sinda an siertuhon na nakapalsok an makina kan behikulo para maiwasan an kaparehong insidente.
