LEGAZPI CITY – Pinalagan kan sarong health reform advocate an pahayag kan Department of Health na Fake news o warang katotoohanan an naglalakop na impormasyon sa social media na igwang panibagong international health concern an naitala kan health experts sa ibang nasyon.
Magigirumduman kaya na naglakop sa mga post sa social media an mapadapit sa naghahalangkaw na kaso kan human metapneumovirus (HMPV) na suboot nagkakawsa nin pagkapano kan mga ospital sa China.
Segun kay Dr. Tony Leachon sa intrevista kan Bombo Radyo Legazpi na bako magayon na apudon ining fake news nin huli ta talagang may nangyayaring kaso dawa kontrobersiyal man o bako.
Igwa suboot na helang na namamatean sa China alagad su mga dati na ining klase arug kan influenza na pigtatamaan an mga maluluya an lawas, resistensya asin pwedesir na magkaigwa man kaini sa Pilipinas.
Pigtawan doon man ni Leachon na bako balanse an mga orolay manungod sa naglalakop na helang sa China mantang mapagal man ini tubudan nin huli ta dae man pigdi-disclose kan naunambitang nasyon an mga kaso bako arug kan nangyari kan sa kasagsagan Covid 19.
Kaipuhan sana kan mga ini nin konsultasyon sa mga doctor asin matawan nin anti viral drug nganing dae na maglala pa an helang kasabay kan pag-iingat nganing maibitaran an harawaan lalo na kun malipot an panahon.
Ipakiuron kaini sa Departamento de Salud na i-validate an mga hospital kun igwa talagang naa-admit na mga kaso manungod sa respiratory illnesses asin aramon kung anong klase ini sa mga masunod na semana.
Suhestyon kaini na ibalik an proper etiquette na ipinaotob kan panahon kan Covid 19 pandemic partikular na an pagsusulog nin facemask, distancing asin sanitizing lalo na kun prone ka na mahawaan nin helang asin maluya an saimong resistensya.
