LEGAZPI CITY—Nakakua an sarong 18-anyos na lalaki nin sarong hand grenade sa tanoman nin mga abaca sa banwaan kan Panganiban, Catanduanes.
Segun ki Panganiban MPS Acting COP PCPT Denver Romero, sa intrevista kan Bombo Radyo Legazpi, na mantang naglilinig an lalaki nakua kaini an hand grenade sa saindang tanoman.
Tulos man ining ipigbalik sa kustodiya kan pulis asin digdi napag-araman na posible pang magsabog an nasambit na granada.
Dugang digdi, ipig-turn over naman ini kan saindang ahensya sa magkakanigong otoridad para sa disposisyon.
Segun sa opisyal na an nasambit na granada sarong military ordinant M67 fragmentation hand grenade kun saen pwedesir ining magkawsa nin peligro sa mga tawo kun dae ini makaputan nin maayos.
Dugang ni Romero na posible suboot na nahulog ini gikan sa mga tropa kan militar na may dara kan siring na bagay.
Mientrastanto, nangapudan an opisyal sa publiko na en kaso may nakua sinda nin mga eksplosibong bagay siring kan granada, makipagkoordinar sa saindang ahensya para matawan nin asistensya asin para maibitaran man an ano man na peligro sa mga namamanwaan.
