Natakdag sa kamot kan mga otoridad an sarong babayeng pigkonsiderar na Municipal Most Wanted Person kan banwaan kan Malinao, Albay.
An suspetsado pigmidbid sa alyas “Manel”, 32-anyos, single, asin residente kan Barangay Tanawan kan nasambitang banwaan.
Susog sa ipinaluwas na mandamiento de aresto kan Regional Trial Court, Fifth Judicial Region, Branch 3, Legazpi City, naarestar an suspetsado sa kasong qualified theft kun saen may pigrerekomendang piyansa na P120,000.00.
Dugang digdi na susog sa reports, an suspetsado soboot nanghabon nin total na P1.3 milyon gikan sa department store sa pagultangan kan taong 2020 hanggang 2022 sa paagi kan dae pagdeposito kan kantidad sa account kan nasambit na tiendahan.
Mientrastanto, nasa kustodiya na kan Malinao MPS an suspetsado para sa magkakanigong disposisyon.
