LEGAZPI CITY-Naarestar kan mga otoridad an sarong babae na drug seller sa ikinasang drug buy bust operation sa Purok 2 Barangay Cabit Manito Albay.
Segun kay Manito MPS Officer-in-Charge Police Captain Jereck Banaynal, sa intrevista kan Bombo Radyo Legazpi, binisto an suspek bilang alyas “ate”, 52-anyos asin bako permanente sa nasambitang lugar, na nagpabalik-balik hale sa Maynila.
Nakuwa sa suspek an sarong gramo nin pigtutubudad shabu na igwang kantidad na P1,000, sa saiyang lawas igwang nakalaag nin pakete nin nasa 4 na gramo nin iligal na droga na nagkakantidad nin nasa P2,720, asin sarong timbangan.
Ipinaaram man suboot an reklamo kan mga opisyal kan nasambitang barangay asin kan mga residente an pagpapabakal kan suspek na nakakapektar sa saindang lugar orog na sa mga kaakian na pigpapabakalan man suboot kaini.
Laoman man kan opisyal na magin drug free an Manito asin helang suboot an droga sa ciudad, kaya nagpatanid siya sa mga imbuelto digdi na magpundo na.
Haloy na man suboot na pigmomonitor an nasambitang suspek asin naarestar ini huli sa tabang kan sarong witness sa pagpapabakal.
Kairiba kan Manito Municipal Police Station an Philippine Drug Enforcement Agency sa ikinasang operasyon.
