LEGAZPI CITY- (Update) Gadan na kan marekober kan mga otoridad sa nagpapadagos na search and rescue operations an saro sa duwa pang minerong na-trap sa laog kan sarong kalot sa pagrasay kan daga sa mining site sa Sitio Bagong Sirang Barangay Panique, Aroroy, Masbate.
Sa intrevista kan Bombo Radyo Legazpi ki PC/Insp. Ariel Neri kan Aroroy Municipal Police, dinara na sa municipal health office an bangkay kan nabistong si John Philip Grego, 28 anyos tangarig na isairarom sa pag-eksamin kan doktor mientras na padagos pang pighahanap si Aljun Balbuena.
Nagpadara naman nin personahes an Bureau of Fire Protection (BFP), Masbate Disaster Risk Reduction and Management Office (DRRMO), First Maneuver Platoon kan Philippine Army, asin man an Emergency Response Team kan Filminera Resources Corporation.
Mientras tanto, nasa stable physical condition na man an lima pang mga minero na naenot nang na-rescue na swerteng mga lugad sana asin gasgas an sinapar.
