LEGAZPI CITY—Binawian nin buhay an sarong lalaki mantang irido an saro pa kaining kaiba makalihis an insidente nin pambabadil sa Ligao City.
Segun ki Ligao City Police Station Officer-in-Charge Police Lieutenant Colonel Kim Lawrence Arenas, sa intrevista kan Bombo Radyo Legazpi, binisto an enot na biktima na 41-anyos na idineklarang dead on arrival; asin sarong 21-anyos, SK Kagawad, na irido sa nasabing insidente, parehong residentes kan Barangay Lomacao, Guinobatan, Albay.
Dinara an 21-anyos na iridong biktima sa hospital kun saen may tama ini sa mag-inibong na tabay.
Dugang ni Arenas na igwa na sindang person of interest sa insidente basado sa nakuang CCTV footage sa lugar kun saen pigtutubudang ining riding-in-tandem.
Padagos man an saindang paghahanap nin iba pang testigo na pwedesir makatabang sa pagbisto sa mga suspek.
Pighayag kan opisyal na posibleng may kinaaraman sa droga an motibo sa pambabadil sa biktima.
Mientrastanto, posibleng mahampang sa kasong murder an mga nasabing suspek.
Mensahe kan opisyal sa publiko na tulos na i-report sa mga otoridad en kaso igwa sindang impormasyon nganing mas mapatibay pa an kasong isusunad kontra sa mga naunambitang indibidwal.
