LEGAZPI CITY – Saro an gadan mantang saro man an irido sa magkasuway na aksidente sa mga tinampo sa banwaan kan Pio Duran sa provincia kan Albay.
Segun kay Pio Duran Municipal Disaster Risk Reduction and Management Office (MDRRMO) Head Noel Ordoña sa intrevista kan Bombo Radyo Legazpi na nakaresibi nin apod an saindang opisina kasubagong alas tras y medya nin maagahon mapadapit sa sarong behikulo na buminangga sa konkretong poste kan sarong cable company.
Sakay kaini an sarong babaying drayber asin dae man nagsapo nin lugad nin huli ta nailigtas ini kan airbag kan behikulo.
Pigngangalasan kaini na nakaligtas an drayber nin huli ta grabe suboot an impact kan pagkabangga, nakabaligtad an kotse, naputol asin nagabot an binanggang konkretong poste hale sa pigkakatindogan kaini.
Pigtarabangan na kan manlain-laing ahensya nganing mahale an behikulo sa pinangyarihan kan aksidente asin maayos na maibugtak sa gilid kan tinampo.
Pigtaram pa kan opisyal na pigkokonsiderar na accident prone area an pinangyarihan kan insidente nin huli ta igwang pakurbadang parte an naunambitang tinampo.
Posible suboot na dae naantisiparan kan driver na kurbada palan an saiyang pig-aagihan asin dae namani-obra an behikulo rason kun kaya buminangga ini sa poste.
Mientrastanto, dead on arrival an sarong persona makalihis an banggaan kan sarong delivery van asin motorsiklo sa kaparehong banwaan.
Pig-likayan kan drayber kan motorsiklo su barandilya kan piggigibong road widening asin dae namalayan na nakabalyo na ini sa ibong na tinampo na pig-aagihan kan nasabing delivery van na nagkawsa sa banggaan.
Pagirumdom ni Ordoña sa mga motorista na mag-ingat sa pagmaneho, magluway luway nin huli ta pigpapaotob ninda an 50km speed limit sa banwaan asin dae maghidali nin huli ta makakaabot man sana sa padudumanan dawa mabantol an pagmaneho.
