LEGAZPI CITY — (UPDATE) Binawian na nin buhay an saro sa tulong biktima nin ligaw na bala sa banwaan kan Daraga, Albay.
Binisto an mga biktima na si Eunice Alejo, 44 anyos mantang nakaluwas na nin ospital asin nagpaparahay sinda Bernardo Lisay, 61 anyos, asin Reymar Mesola 24 anyos na anas residente kan Barangay Tabon-Tabon.
Segun ki PSupt. El Cid Roldan, hepe kan Daraga Municipal Police, nagsirong sana sa sarong tolda an tulo kan biglang magkaigwa nin kariribukan sa laog kan baylehan.
Tulos man na naidalagan sa ospital an mga biktima na nagsapar nin tama sa tulak, tuong tabay asin likod.
Base sa imbestigasyon kan Daraga-PNP, mabalos suboot an suspek na si Jomar Lodor residente kan Barangay Gapo sa mga kalalakihan na nambungag sa amigo kaini na si Ronald Vegas.
Dae man pigpensar kan mga ini na may darang revolver an suspek kun kaya nauli ini sa agawan asin biglang pinaputok kan gunman.
Nagpalyar man an pulisya na madakop an suspek na base sa mga parientes kaini dae nag-uli sainda makalihis an insidente.
Nagtataka man an hepe kun pano nagkaigwa nin badil an suspek bangan saro ining construction worker.
Sa ngunyan, padagos an saindang pigkokondusir na hot pursuit operation sa suspek mantang nagmumundo man an pamilya Alejo sa sinapar kan saindang padaba sa buhay.
