LEGAZPI CITY – Pigladawan kan sarong peace studies professor si Russian President Vladimir Putin makalihis an duwang magkasunod na pakikipag-olay kaini sa mga lider kan darakulang nacion poon kay United States President Donald Trump sagkod sa pag-iiribahan ninda Chinese President Xi Jinping, asin North Korean leader Kim Jong Un.
Segun ki Bicol University Peace Studies Professor Dr. Herbert Rosana sa intrevista kan Bombo Radyo Legazpi na maikokonsidera niyang eksperto si Putin sa pagmamanipula kan realidad asin nakukuwa an gabos na naratibo na nagpapabor saiya.
Kun hihilingon suboot an bentahe para kay Putin an piggibong pakikipag-olay niya kay Trump sa Alaska huli ta napahiling niya na mas matibay siya asin mas marhay kompara ki sa lider kan US mantang pigtutuyo kaini na magpa-late sa mga appointments nganing mamatean kan ibang lider an importansya kan saiyang presensya.
Naipapahiling man ni Putin na nakadepende man sa pag-uugali kan sarong lider kun mapaparahay an nacion na saiyang nasasakupan o madadara niya ini sa pagbagsak.
Pigtaram pa kan naunambitang propesor na makatakot si Putin kun nasa Russia ka huli ta pwedesir niyang rauton an reputasyon kan sarong tawo sa paagi kan pagkrear nin fake news laban sa saiyang mga kritiko.
Sa ginibo man na pag-oolay ninda kaiba an lider kan China asin North Korea an nagpapahiling suboot nin psychological warfare message o patanid laban sa North Atlantic Treaty Organization (NATO).
Magkakaigwa man nin epekto para sa Pilipinas an pag-oolay kan tulong lider huli ta an satuyang nacion an nagsisirbing koneksyon kan United States sa Southeast Asia.
Pagdoon pa ni Rosana na sa ibong kan pag-oolay kan tulong darakulang nacion an magtetenir na silensyo an Association of Southeast Asian Nations (ASEAN) huli ta abo ninda maki-aram asin madamay pa sa posibleng tensyon sa kinaban.
