Kinontra ni dating Presidential Spokesperson Atty. Harry Roque an kahagadan kan Pilipinas para sa sarong Interpol Red Notice laban saiya, inapod man kan dating opisyal na pagbalgar suboot ini sa international regulation asin an panggigipit saiya an resulta suboot kan mga politically motivated na kaso.
Sa sarong pahayag, sinayumahan ni Roque an kahagadan na Red Notice, asin ipigdoon na siya an sarong protektadong bona fide asylum seeker sa irarom kan Netherlands asin kan European Union.
Segun saiya may opisyal siyang dokumento gikan sa Dutch Immigration and Naturalisation Service na nagpapatunay sa saiyang protektadong status.
Nanindugan pa si Atty. Roque na peke an kasong syndicated trafficking laban saiya asin parte kan inapod niyang paghihiganti kan administrasyong Marcos laban sa mga alyado kan dating Presidente Rodrigo Duterte.
Segun saiya piggamit an reklamo nganing “wasakon asin patahimikon” siya bilang sarong kritiko ni Presidente Ferdinand Marcos Jr.
Binanggit man ni Roque na an kahagadan kan gobierno para sa Interpol Red Notice an sarong pagbalgar sa legal framework kan Interpol, partikular na an Article 2 kan Interpol Constitution na naglalatag nin mga obligasyon kan organisasyon sa karapatang pantawo, asin an Article 3 na nagbabawal sa mga kasong “pang-politika.”
Dugang pa niya, nagsumiter na siya nin pormal na pagtutol sa Commission for the Control of Interpol’s Files, an ahensyang may mandato na magrepaso kan mga kahagadan para sa Red Notice, asin hinagad na dae pag-aprubaran an kahagadan kan gobierno kan Pilipinas.
