Inihalo na sa general population kan kan New Quezon City Jail Male Dormitory si dating senador Ramon “Bong” Revilla Jr., sarong semana makalihis siyang mailaog sa karsel.
Segun sa Bureau of Jail Management and Penology (BJMP), makakaiba sa selda ni Revilla an anom pang mga persons deprived of liberty (PDL) na warang kinaaraman sa kaso kan anomaliya sa flood control project sa Bulacan.
Natapos na ni Revilla asin kan apat sa saiyang mga co-accused an mandatory 7 days na medical quarantine para sa mga bagong PDL asin ibinalyo sa ordinaryong selda kan Martes.
Nahahampang an mga ini sa kasong malversation of public funds asin falsification of public documents katakod kan suboot ₱92.8-million na ghost flood control project sa Pandi, Bulacan.
Sinabi kan BJMP na an mga kaibang inmate ni Revilla an mga low-risk PDL, base sa security, medical, asin legal assessments.
Alagad, nagtetenir an mahigot na seguridad huli sa high-profile kan kaso, asin bako suboot ini VIP treatment.
Antes an pagbalyo, binisita si Revilla kan saiyang pamilya, kabale an saiyang agom na si Rep. Lani Mercado, na nagsabi na pangadyi an saindang sandigan asin marhay an kamugtakan kan dating senador.
Padagos na nakakulong sa Quezon City Jail si Revilla asin an saiyang mga co-accused mantang pigdadangog pa kan Sandiganbayan an saindang kaso.
