LEGAZPI CITY – Paramientras na ipigpundo an nagpapadagos na restoration sa laog kan St. John the Baptist Church sa Tabaco City, Albay nganing magtaong dalan sa nagdadangadang na semana santa.
Segun ki Commission on Temporalities head kan simbahan na si Urgel Cargullo sa intrevista kan Bombo Radyo Legazpi na wara sindang isinagibong pagpapakarhay sa laog kan simbahan nganing dae maapektaran an saindang aktibidad sa enterong durasyon kan mahal na araw.
Ibabalik an pagbubugtak nin scafolding sa laog kan simbahan pakatapos kan holy week para sa paglaag nin painting sa dome kaini.
Dae man magigibo suboot gabos na patrabaho sa bilog na simbahan huli sa kakulangan nin budget makalihis halion an nakatalaang pondo para digdi.
Pigdugang pa kaini na dakulang tabang kuta sa saindang pondo an hinali kan mga kongresistang miyembro kan Bicam an nakatalaang pondong ipigbusol kan namaaram na Congressman Edcel Lagaman para sa renovation kaini na nag-aabot sa P35M.
Sa ibong kan kakulangan nin budget, napakarhay na ninda an ibang parte kan simbahan arug na sana kan pastoral center, atop kan pigtuturugan kan mga padi nganing magin komportable man sa mga matenir sa pasilidad.
Piglalaoman ninda na maruso an mga deboto asin turista sa saindang simbahan sa maabot na sabado, sarong aldaw antes an dominggo de ramos huli ta wara nang laog sa trabaho an kadaklan.
Kamawotan ni Cargullo ngonian na kamahalan an magkaigwa nin bastanteng pondo an saindang simbahan nganing mapakarhay asin matapos ini antes mag-abot an panahon nin tag-uran asin mga bagyo.
