LEGAZPI CITY — Naghagad na nin tabang si Board Member Rolly Rosal kan Sangguniang Panlalawigan ng Albay ki Pres. Rodrigo Duterte tangarig na maaksyunan an resolusyon na pagpapapundo kan implementasyon kan duwang executive orders sa provincia dapit sa quarry resources.
Sa intrevista kan Bombo Radyo Legazpi sa nasabing opisyal, sinabi kaini na ipinadara na an April 17 privileged speech sa paagi kan registered mail sa Presidential Complaint Center ngani na mapapundo na an pagpapautob kan Executive Orders number 003-2017 asin 002-2018.
Segun ki BM Rosal, enot nang na-deny an ipinasar na resolusyon sa SP asin dae man naaksyunan kan concerned committee makalihis an 30 aldaw kun kaya nagdesisyon na maghagad na nin tabang sa Palasyo.
Liwat na ipigduon kan opisyal na bako lehitimong basehan an EO sa pagsingil nin quarry tax kun sain an dating P300 an naging P500 na.
Klarado man, segun ki Rosal sa Republic Act 7160 o an Local Government Code na dapat backed up nin provincial ordinance an kasuguan.
Dugang pa ni BM Rosal na dapat nag-agi sa tamang proseso siring kan pagkondusir nin public hearing o consultation antes na magpautob kan ley huli ta numero unong apektado kaini an mga namamanwa man sana.
Alagad warang ebidensya na wara nin ipigtataong resibo sa pagsingil, sinabi kan bokal na aram man kan mga contractor an totoo alagad takot sanang magtestigo.
Naglalaom man ini na magkakaigwa nin magayon na resulta o positibong aksyon an ipigsunad na reklamo.
