LEGAZPI CITY – Nag-ebakwar na an ibang residentes kan Barangay Anoling, Camalig, Albay huli sa huma kan Bulkang Mayon na presenteng nasa alert level 3 na.
Segun ki Barangay Kagawad Roldan Obal sa intrevista kan Bombo Radyo Legazpi na saindang pigtawan prayoridad an mga pamilyang naka-istar sa laog kan 6KM permanent danger zone.
May mga residente man sindang nagsayumang mag-ebakwar huli sa takot na bayaan an saindang omahan asin atamang hayop alagad sa kagayunan an napaki-olayan man kan mga kapulisan.
Inani na man kan ibang paraooma sa lugar an tinanom nindang mga gulay nganing dae masayang enkaso maglala pa an kamugtakan kan Bulkang.
Pangapodan man kan opisyal na tabangan an saindang mga residenteng paraooma sa oras na magbalik normal na an gabos arug na sana kan mga ayuda.
Kahagadan ni Obal sa publiko na dae na magpasaway asin magsunod na sa mga abiso kan mga otoridad.
