LEGAZPI CITY-Trending sa ngunyan sa social media an reklamo kan sarong turista sa pasyaran na Quituinan Hill sa Camalig, Albay makalihis na mabiktima nin pambubuso.
Sa intrevista kan Bombo Radyo Legazpi sa nagrereklamong si Ron Colasito, Mayo 27 nin banggi kan magpasiring siya sa tourist spot kaiba an agom asin duwang amigong lalaki ngani na mag-overnight.
Hasta sa magpaiba sa banyo an saiyang agom, alagad mantang nasa CR ini narisa ni Ron an sarong lalaki na nakahigda sa likod kan banyo asin nambubuso sa saiyang misis.
Kan sitahon na an lalaki marikas suboot ining nagdulag papasiring sa barracks kan caretaker asin dae naman nahiling pa.
Pigrereklamo sa ngunyan ni Ron na nagluluwas na mismong an caretaker mismong an nambuso sa saiyang misis base naman sa diskripsyon kan kaini.
Dagdag insulto pa suboot an pagpalyar kan mga pulis na magresponde kan maghagad sinda nin tabang huli sa pagkahandal man na makaengkwentro kan mga kalaban kan gobyerno sa lugar.
Nilinaw ni Ron na habo niya naman na padakulaon pa an isyu asin mawot sanang mapanimbag an suspek ngani na dae na ini nin mabiktima pa lalo pang nagluluwas na bako ini an enot na beses na may kaparehong insidente sa lugar.
