LEGAZPI CITY – Nakaguno nin bulawang medalya an rehiyon Bicol sa nagpapadagos na Palarong Pambansa 2025 sa Laoag, Ilocos Norte.
Segun ki Albay Schools Division Spokesperson Froilan Tena sa intrevista kan Bombo Radyo Legazpi na nakuwa an nasabing medalya sa Arnis Individual Single Weapon event.
Binisto an medalist na si Philip Anthony Crisponde, 16-anyos na student-athlete asin estudyante kan Marcial O. Rañola Memorial School sa Guinobatan, Albay.
Pag-istorya niya pa na pirang taon nang naglalaban si Crisponde sa mga nakaaging palarong pambansa asin ini an enot na bes na nanggana ini nin gold medal.
Ginamit na advantage kan nasabing atleta an pagdugang sa saiyang mga moves asin style sa pag-arnis.
Pigtaram pa kan opisyal na huli sa trayumpo suboot ni Crisponde an dae na mauling luhaan an rehiyon sa larangan kan arnis.
Bako man suboot madali an inagihan kaini huli ta may mga nakalaban na ining mga atleta na hale pa sa mga powerhouse regions.
Pigsyerto man ni Tena na laoman nang may makakakuwa pang medalya hale sa mga pambato kan rehiyon bicol sa manlain-laing larangan.
