LEGAZPI CITY – Kasabay kan paglaog kan bulan kan Marso, ioobserba man kan Bureau of Fire Protection (BFP) an ika 51 taon kan Fire Prevention Month sa enterong Pilipinas.
Bilang pagsunod sa nasabing kasuguan, ilulunsar an fire prevention month sa rehiyon sa maabot na Marso 7 kun saen parte kan kick-off an pagkokondusir nin parada asin awarness campaign kasabay an mga lokal na ehekutibo, Department of Education, non-government organizations, asin volunteer fire brigade na mangyayari sa Bicol University grounds.
Sa intrevista kan Bombo Radyo Legazpi ki Bicol Regional Director Fire Chief Supt. Igmedio Bondoc Jr, sinabi kaini na antes matapos an Pebrero mas maray na maipaabot sa publiko an mga programang nakapalaog bako sana para sa bulan kan Marso kundi bilog na taon.
Kasabay na digdi an padagos na pagsagibo nin Barangay Ugnayan para sa seminars na tutukaron an mga dapat na gibuhon kan lambang residentes enkasong magkaigwa nin kasulo asin an mga dapat gibuhon ngane maibitaran an nasabing insidente.
Segun pa sa opisyal, ginibong Marso an nasabing fire prevention month huli sa labing init tuyong bulan na ini alagad sa ngunyan, huli naman suboot sa namamateang climate change, mas maray na ikonsiderar na fire prevention month an enterong bulan kan taon.
Mientrastanto, segun ki Bondoc, nag-oorganisa man sinda nin volunteer fire brigade huli sa nagtutubod sinda na ini an magiging katabang ninda sa pag-apula nin kasulo.
An mga ini kaya suboot an maserbing first line of defense antes pa man mag-abot an lehitimong mga bumbero asin an mga volunteers an makondusir nin paenot na lakdang ngane na dae na mapalakop asin magdakula pa an kasulo.
