LEGAZPI CITY — Arestado an sarong wanted person sa ginibong operasyon kan Barcelona Municipal Police sa Baranga Mapapac sa nasabing banwaan kan Sorsogon.
Binisto an suspek na si Joel Dematera, 41-anyos asin residente kan lugar.
Segun ki Pol. S/Insp. Benjiel Jhon Danglosi, an hepe kan nasambit na hepatura, naarestar an suspek sa bisa kan mandamiento de aresto na iniluwas ni Judge Bernardo Jimenez Jr kan Regional Trial Court Branch 54 kan banwaan kan Gubat.
Nahahampang si Dematera sa pagbayolar sa duwang counts nin Acts of Lasciviousness in relation to Republic Act 7610 o an Anti-Child Abuse Law na may rekomendadong pyansa na P80,000 kada sarong count.
An nasabing suspek an ika-siyam sa listahan kan most wanted person kan banwaan.
Sa ngonian, nagtetenir an suspek sa detention facility kan Barcelona PNP para sa magkakanigong disposisyon.
