LEGAZPI CITY – Aminado an Rank 7 sa nakalihis na October 2019 Geodetic Engineer Board Examination na bako madali an kursong Geodetic Engineering kaya ipighanda na niya an sadiri para sa mga posibleng agyat na kakahampangon.
Pagheheras ni Arjay Nuñez sa intrevista kan Bombo Radyo Legazpi, ini man an nagin dalan kaya nagpursigeng mag-adal mantang nasa kolehiyo.
Tinutukan ni Nuñez an mga subjects na pinakanadidifisilan siya urog na an Mathematics tangarig na mapaghandaan an mga eksaminasyon asin board works na ipigpapagibo sa eskwelahan.
Dugang pa ni Nuñez na inspirasyon man an mga magurang urog na an ama na nagtatrabahong Overseas Filipino Worker (OFW) sa ibang nacion.
Napag-araman na labi an kaogmahan kan mga ini kan maaraman na nakua niya an ikapito sa pinakahalangkaw na pwesto sa eksaminasyon.
Mientras tanto, plano man kaini sa ngonian na maghanap na nin trabaho tangarig na makatabang sa pamilya urog na sa apat pang mga tugang.
