Pig-enganyar ni Akbayan Party-list Rep. Perci Cendaña an mga kapwa kaini mambabatas na dae pag-apudon na pastor an nakakulong na televangelist na si Apollo Quiboloy huli ta insulto suboot ini sa mga tunay na pastor na may integridad na nagseserbi.
Sa hearing kan House Committee on Justice sa proposal na amyendahan an extradition law, hinagad ni Cendaña sa saiyang mga pag-iriba na apodon sana si Quiboloy bilang “Mister” asin bako pastor.
Nanindugan si Cendana na insulto sa mga tunay na pastor an pag-apod ki Quiboloy na pastor.
An siisay man na nagkukulog sa saiyang mga miyembro asin nagmomolestiya sa mga kaakian an dai maaapod na tunay na pastor.
An House Committee on Justice nagsagibo nin motu proprio investigation sa ley nin extradition kan nasyon kasunod kan surat ni Cendaña kan Agosto 23, na naghahagad nin pagrepaso huli sa mga pendienteng kaso ni Quiboloy sa Pilipinas asin sa U.S.
Segun ki Batangas 2nd District Rep. Gerville “Jinky Bitrics” Luistro, may katuyuhan an hearing na “evaluate, study and revisit” an Presidential Decree 1069 o an Philippine Extradition Law of 1977, siring man an extradition treaty sa pagultanan kan Pilipinas asin kan U.S.
Ginigibo an hearing mantang si Quiboloy yaon sa Pasig City Jail.
Hahampangon niya an kasong child sex trafficking sa Pilipinas asin sarong pending extradition request hale sa U.S.
Si Quiboloy asin an saiyang mga pag-iriba sa Kingdom of Jesus Christ (KOJC) kinasuhan sa California huli sa sex trafficking, pandadaya asin bulk cash smuggling.
Sa saiyang pahayag sa enot na hearing dapit sa extradition law, nagpasalamat si Cendaña sa pagsimbag kan justice panel sa saiyang kahagadan asin tinawan duon an mga seryosong akusasyon kontra ki Quiboloy
Pigduon kaini na tama sanang imbestigaran kan komite an kamugtakan kan U.S. extradition request para ki Quiboloy asin determinaran kun anong aksyon an dapat gibuhon kan mga ahensya kan Pilipinas susog sa ley asin mga kasunduan.
Dugang pa ni Cendaña na an kaso bako sana manungod sa pag-utob kan sarong internasyunal na obligasyon kundi manungod sa pag-establisar nin accountability.
