LEGAZPI CITY — Boluntad na nagsurendir sa mga otoridad an sarong jeepney driver na aksidenteng nakaligis sa sarong pulis sa Barangay Bañag, Daraga, Albay.
Binisto an PNP personnel na si Patrolamn Reynimart Taberna, 28-anyos na naka-assign sa Regional Mobile Force Batallion 5.
Base sa inisyal na imbestigasyon, lunad kan motorsiklo an biktima pasiring sa Daraga kun sain nasa enotan ini kan jeep na pigmamanehar man ni Martin Navarro, 41-anyos asin residente kan Caguiba, Camalig.
Pag-abot sa pinangyarihan kan insidente asin sa dae maaraman na rason, aksidenteng nabangga kan suspek an biktima.
Dinara sa ospital si Taberna alagad gadan na kan mag-abot sa Bicol Regional Training and Teaching Hospital (BRTTH) sa Legazpi City.
Makalihis an insidente, tulos na nagsakay sa jeep pasiring sa Camalig si Navarro kun sain digdi siya boluntaryong nagsuko.
Sa ngonian, nakakulong na an nasabing driver sa detention facility kan PNP.
