LEGAZPI CITY- Nag-abiso an mga otoridad sa mga paratienda asin konsumidores na siertohon na salbadong kaonon asin nag-agi sa inspeksyon an gabos na mga produktong pigbabakal sa merkado.
Kasunod ini kan nakuang duwang kilo nin butete na naihalo sa dried fish sa merkado kan Daraga sa isinagibong inspeksyon kan Bureau of Fisheries and Aquatic Resources (BFAR).
Sa intrevista kan Bombo Radyo Legazpi kay Themis Lobete an admin head kan Daraga Public Market, nilinaw kaini na isolated man sana an kaso asin nagkataon na may naihalo na mga butete sa produkto na tulos man suboot na nahali.
Napag-araman na delikado an butete huli ta may mga insidenteng naireport na nagkakawsa ini nin pagkahudong asin maging pagkagadan sa mga nakakakaon.
Hinali man kan opisyal an pagkahandal kan publiko huli ta aksidente man sana suboot na naihalo sa produkto an mga nasabing butete na dae man pigtutuyo kan mga paratienda.
Inasegurar man kaini na wara nin siring pang nakakahudong na sira sa merkado huli ta saro-saro na suboot na naglibot asin nag-inspeksyon an mga personahes kan BFAR sa bilog na merkado.
