LEGAZPI CITY— Pirang bulan makalihis an pag-dissolve ni Legazpi City Mayor Noel Rosal sa Public Security Office (PSO), inanunsyar kan City Hall Human Resources Department an liwat na pagbubukas kan aplikasyon sa nasambitan na opisina.
Sa intribista kan Bombo Radyo Legazpi ki Bing Baldano, Officer in Charge kan nasambitan na departamento, nagpaluwas na sinda kan mga kwalipikasyon para sa mga nagmamawot na magin parte kan magigin bagong PSO sa syudad.
Sigon ki Baldano, pighahanap sa trabahong ini an mga lalaki, naka-tungtong nin maski sagkod sa 2nd year college asin nakakua nin 72 units, physically fit, nasa 5’6″ an langkaw, asin 21-35 anyos.
Para sa mga aplikante, kaipuhan sanang magsumiter nin barangay, police asin NBI clearance, certificate of good moral character, cedula, NSO birth certificate asin diploma o ano man na dokumentong makakapatotoo na nakatapos nin 72 units sa kolehiyo.
Apwera digdi, kaipuhan man suboot na mag-fill out sa application form na abilable na sa munisipyo.
Isusumiter ini sa Abril 28 asin ma-exam sa Mayo 2, alas 8:00 nin aga.
Nasa 200 na application forms sigon ki Baldano an abilable sa saindang opisina.
Ini pa sana suboot an solamenteng kasuguan ni Mayor Rosal asin naghahalat pa sinda kan sunod na magigin lakdang kan alkalde makalihis an nasambitan na eksaminasyon.
Kun babalikan, tinerminate kan opisyal an kontrata kan gabos na empleyado kan PSO katakod kan mga suboot nagdadakol na reklamo kontra digdi.
Klinaro man ni Baldano na bukas man giraray an trabaho sa mga dati nang Public Security Officers alagad magigin pantay an pagtratar sainda sa mga bagong aplikante.
