LEGAZPI CITY – Tinawan duon kan alkalde kan Bacacay, Albay na namana nya man sana an presenteng problema kan banwaan sa basura.
Ipighayag ni Bacacay Mayor Dinky Romano na ini na an saiyang inabutan puon kan magtukaw bilang alkalde kan Bacacay kun kaya padiit-diit nya suboot ining pigreresolbaran.
Sa katunayan, sinabi ni Mayor Romano na kakatapos pa sana ninda sa pag-rehabilitate sa dating dump site sa Brgy. Cagbulacao asin pighahalat pa an resulta kan hydrogeological survey na ipigsasagibo ngunyan kan Mines and Geosciences Bureau (MGB) sa saindang propuestong lugar para sa konstruksyon kan sanitary landfill (SLF.)
Sigon pa sa alkalde, nagbakal an saiyang predecessor nin lote para kuta sa SLF.
Alagad iligal suboot an prosesong inagihan kan pagbakal kaini kun sain overpriced asin kwalipikado sanang magin material recovery facility (MRF.)
Maduon na sinabi ni Romano bako huli sa saiyang kapabayaan an problema kan lugar sa basura.
Dinepensaran man kaini an saindang Municipal Environment and Natural Resources Office (MENRO) sa mga huruding-huding na nagkukulang ini sa implementasyon.
Sa ngunyan, hagad kan opisyal sa saiyang mga constituentes an kooperasyon asin kun dae man suboot makakatabang sa pagresolbar kan problema, imanehar na sana nin tama an kanya-kanyang basura.
