LEGAZPI CITY- Dae pa nin kumpirmasyon ngunyan an komite kan Palarong Bicol 2017 kun siisay an pinal na huespe de honor sa pagbubukas kan event.
Alagad sa intribista ki Rey Dimaculangan, City Sports Coordinator kan Legazpi City, sinabi kaini na nagpadara nin imbitasyon si Mayor Noel Rosal ki Presidente Rodrigo Duterte ngani na magin guest of honor sa nasambitan na pakawat na gigibuhon sa Albay Sports Complex bilang main venue.
Sigon ki Dimaculangan, dae pa nin pigpapadarang kumpirmasyon an opisina ni Presidente Duterte kun pig-aako kaini an imbitasyon kan alkalde.
Mientrastanto, makakaresibe suboot nin token na miniature kan Ibalong hero na si Baltog an mga magigin gold medalist sa patiribayan mantang an disenyo man kan medalya, susog sa nangganang design sa ipigsagibong pa-contest kan Department ofd Education (DepEd.)
Kumpirmado na man ngunyan na an replica ni Baltog an inarog para sa mascot kan Palaro.
Naglalaom si Dimaculangan na makakakua nin spot an Albay maski sa Top 3 sana kan taon-taon na patiribayan sa manlaen-laen na sports kan 13 dibisyon kan mga pampublikong eskwelahan sa rehiyong Bicol.
