LEGAZPI CITY- Pinuunan kan mga delegado kan Palarong 2017 an pre-activities ngunyan na aldaw sa paagi kan fun-run asin ceremonial tree planting.
Nag-abot sa syudad kan Legazpi, na host ngunyan na taon kan nasambitan na sporting event an poco mas o menos 7,500 na delegado gikan sa 13 dibisyon sa rehiyong Bicol.
Atyan na banggi, piglalaoman an maogmang welcome celebration para sa mga atleta asin opisyales na sabay-sabay na isasagibo sa kanya-kanyang billeting centers.
Nakalinyada pa an dakol na pre-activities antes an grand opening sa Domingo.
Kabale sa mga aktibidades an Mayor’s night, Congressman’s night asin Governor’s night.
Todo man an pagbantay kan mga security officers ngani na masyerto an kaligtasan kan mga delegado.
Sa intribista ki Legazpi Schools Division Supt Cecile Rivera, sinabi kaini na mabugtak nin barikada an mga pulis durante kan parada na isasagibo sa Domingo kun sain sasaraduhan man an dalan sa Albay district o an pasiring sa Bicol University para sa nasambitan na aktibidad.
Hagad ngunyan kan opisyal an matrayumpong pag-host kan syudad kan Palarong Bicol 2017 katakod na an paz y orden kasabay kan pagdayo kan mga bisita.
