LEGAZPI CITY- Nagkaigwa nin pagbaba sa power rates sa bulan nin Pebrero sa provincia kan Albay.
Segun ki Albay Electric Cooperative Spokesperson Anj Galero sa intrevista kan Bombo Radyo Legazpi na huli sa pagbabawas kan presyuhan sa Wholesale Electricity Spot Market kaya magkakaigwa man nin pagbabago sa singil sa provincia.
Napag-araman na nagbaba nin P1.0184 para sa mga residential asin low-voltage na konsumidores mantang nasa P0.9478 an pagbaba sa singil kan high-voltage na konsumidores.
Kaibanan sa mga factors kan pagbaba kan kantidad kan kuryente an huli sa wet season kun sain dae marhay nagagamit nin appliances an nagkapirang mga konsumidores.
Segun pa sa ahensya na sa mainland nasa P7.1782 an kada kilowatt para sa residential, P6.1978 sa low voltage asin P4.7965 para sa kada kilowatt per hour sa high voltage.
Sa residential man para sa island municipalities, nasa P11.2195 an kada kilowatt pero hour mantang P10.6509 sa low voltage.
Alagad sa ibong kaini, nilinaw man ni Galero na nakadepende man liwat sa konsumo kan mga konsumidores an saindang babayadan.
