Makalihis an Angelus prayer sa St. Peter’s Square sa Vatican kan nakaaging dominggo, Enero 11, ipigpangadyi kan lider kan Simbahang Katolika an katuninongan sa Middle East partikular na sa Iran asin Syria, kun saen nagpapadagos an tensiyon na padagos na naggagadan kan kadakol na buhay.
Ipigpangadyi man kan Santo Papa na padiit-diit an magin mabunga an diyalogo asin katuninongan para sa pagguno kan pangkalahatang karahayan kan bilog na sociodad.
Poon pa kan Disyembre kan nakalihis na taon, an Iran an nakakamate nin panibagong mga demonstrasyon laban sa regime, na naglakop pa sa kadakol na probinsiya kan nacion sagkod sa nauli sa kariribukan kun saen puminakol na sa 500 an napabaretang nagadan asin ipigpangapodan an pagwawakas kan presenteng regime.
Mantang sa Syria man, nakakamate nin mahiwasang labanan sa mga nakalihis na aldaw sa pagultangan kan army asin Kurdish forces sa northern city kan Aleppo.
Isinabay man kan pontiff sa saiyang pangadyi an mga nagtitios, na naiipit sa giyera sa Ukraine asin binuhay liwat an pangapodan para sa pagtatapos kan kadahasan asin panibagong mga lakdang nganing maguno an katuninongan.
Ginibo kan Santo Papa an pangapodan sa tahaw kan panibago na namang mga pag-atake sa Ukraine partikulamente na sa mga pangenot na energy infrastructure kan Ukraine sa tahaw kan malipot na panahon kun saen pinakaapektado digdi an mga sibilyan.
