LEGAZPI CITY – Ipigdepensar kan sarong police rapper an kapwa rapper na si Shanti Dope makalihis na magbungkaras an isyu na mawot kan Philippine Drug Enforcement Agency (PDEA) na ipagbawal an pag-ere kan kantang “Amatz”.
Enot nang ipighayag kan PDEA na nagpo-promote suboot an nasabing rap song kan paggamit nin iligal na droga.
Paliwanag ni Patrolman Dean Rasco o bisto man bilang si SneeKee sa intrevista kan Bombo Radyo Legazpi, nagpapraktis sana suboot si Shanti kan artistic freedom mantang mahiwas siya magsurat.
Aminado man si Rasco na ikinadisganar kan madangog an isyu urog na komon na nami-misunderstood na klase kan musika an mga liriko kan rap.
Nakapalaman suboot sa kada obra an pag-obserbar sa palibot asin an libredong pag-iisip kan artist tangarig na makapaghayag kan opinyon.
Dugang pa kan police rapper na kun tatawanan nin pagcensor an mga Original Pilipino Music, dapat na mas enoton na tutukan an mga foreign songs na locally-released asin dakol na iba pang kantang talagang nagi-imply kan paggamit nin illegal substance.
Mientras tanto bilang parte kan police force, nilinaw ni Rasco na suportado an mga anti-criminality campaign urog na an anti-drug war mantang nagtutubod man ining mas magigin marhay kun magkakaigwa nin matanos na pag-oolay an duwang lado.
