LEGAZPI CITY- Nagsasamantala an nagkapirang pasaway na pulis kun kaya dae na muna pigtutugutan an Pambansang Pulisya na magkundusir nin buy-bust operation asin mag-implementar nin search warrant.
Ini an pahayag kan hepe kan Legazpi PNP na si PSUPT Nilo Berdin.
Sinabi kan hepe na maski hinali sainda an nasambitan na poder, padagos man giraray an normal na trabaho kan kapulisan.
An barangay drug-clearing operation, dae man suboot pighahali sainda kun sain tinawan duon man kaini na igwa nin administrative obligation an mga opisyales kan barangay asin an Barangay Anti-Drug Abuse Council (BADAC) sa kampanya kan gobyerno kontra iligal na droga kun kaya magkakanigo sanang makipagkooperar an mga ini sa pagpuho kan nasambitan na problema.
Alagad kun magpalyar na gibuhon an saindang papel, pwedesir na magsangat nin kaso an Philippine Drug Enforcement Agency (PDEA.
Katakod kaini, nagpahayag man si Berdin na “very willing” an PNP na magsuporta sa PDEA sa isyung pang-seguridad sa mga anti-illegal drug operations.
Maski ipinasakamot na muna sa PDEA an mga operasyon kontra sa illegal drugs, sinabi ni Berdin na padagos an saindang pagtabang sa magigin trayumpo kan kampanya.
