LEGAZPI CITY-Pigkakarkulong nasa 15,000 na tauhan kan Philippine National Police an idedeploy sa Metro Manila poon Nobyembre 16 hasta 18 ngani masierto an seguridad sa 3 aldaw na pagtiripon kan manlain-lain na grupo, kairiba na an Iglesia ni Cristo.
Pigsierto ni PNP acting Chief Police Lieutenant General Jose Melencio Nartatez Jr. an pagrespeto asin pakikisaro kan ahensya sa matoninong asin ligtas na pagtiripon.
Kairiba sa mga babantayan an Quirino Grandstand, EDSA Shrine, People Power Monument, mga kakalsadahan harani sa Malacañang, Bangko Sentral ng Pilipinas, Senado, Kamara, Embahada kan Amerika, asin iba pa.
Magpapaotob man nin koordinasyon sa trapiko, pagmamanihar kan publiko, asin police visibility segun man kay PNP Public Information Office Chief PBGen. Randulf Tuaño.
Segun kay Nartatez, trabaho nindang masierto an kaligtasan kan mga matiripon kasabay an pagrespeto sa mga direchos kan kada Pilipino.
