LEGAZPI CITY- Nagin organisado asin matrangkilo an enot na aldaw kan paglalansar kan simultaneous checkpoint sa bilog na rehiyong Bicol.
Ini maski pa padagos na nakaka eksperyensya nin maraot na paahon an rehiyon.
Segun ki Police Regional Office 5 Director Police Brig. General Andre Dizon sa intrevista kan Bombo Radyo Legazpi na warang nairehistrong confiscation nin badil asin iba pang mga armas kasabay kan pagkokundusir nin mga checkpoints.
Ini an kasabay kan pag-iral kan gun ban para sa preparasyon sa nagdadangadang na pirilian.
Hagad man kan opisyal na hasta sa matapos an eleksyon, magin matrangkilo an pangkabilugan na sitwasyon.
Mientras tanto, padagos man an koordinasyon kan Philippine National Police sa iba pang mga ahensya de gobierno asin stakeholders ngani na masierto an matrangkilong election period.
