Ipigrekomenda kan House Committee on Good Government and Public Accountability an pagsunad nin kasong plunder laban ki Vice President Sara Duterte katakod kan iregularidad suboot sa paggastos kan confidential funds.
Kaiba man sa pigpapasunadan nin kaso an mga opisyal asin dating opisyal kan Office of the Vice President (OVP) asin Department of Education (DepEd) pati na an chief of staff ni Duterte na si Atty. Zuleika Lopez.
Ipigrekomenda man kan komite an pagsunad nin kasong technical malversation, falsification, bribery asin graft and corruption laban sa mga imbuelto.
Pinakusog kan Kamara de Representantes an committee report sa sesyon kan Martes nin banggi makalihis basahon kan chairperson kan komite na si Manila Rep. Joel Chua.
An rekomendasyon an nag-ugat sa iregularidad suboot sa paggastos kan P612.5 milyong confidential funds sa irarom kan OVP asin DepEd kan 2022 asin 2023.
Ipigrekomenda man kan komite na amyendahan an Joint Circular No. 2015-01 nganing maibitaran an pag-abuso sa paggamit nin confidential funds.
Pighagad man kan komite an pagkrear nin pamantayan sa pagbisto kan mga ahensya na pwedesir tawan nin confidential funds asin an limitasyon sa kantidad kaini.
Ipigrekomenda man kan komite ni Chua an pag-amyenda sa Secrecy of Bank Deposits Law (Republic Act 1405) nganing pwedesir mabuksan an bank account kun haen an pondo ngani madiskotir ini kan Kongreso.
An kopya kan committee report an ipapadara sa Office of the Ombudsman, Commission on Audit, Department of Justice, asin Department of Budget and Management para sa saindang impormasyon asin tamang aksyon.
