LEGAZPI CITY – Nagtaong eksplinasyon an Pio Duran Municipal Disaster Risk Reduction office sa publiko mapadapit sa pagpapaotob nin resumption of classes sa ibong kan rainfall warning kan state weather bureau.
Segun kay Pio Duran MDRRMO Head Noel Ordoña sa intrevista kan Bombo Radyo Legazpi na napagdesisyunan nindang ipadagos an klase nin huli ta wara mang namateang pag-uuran an banwaan poon pa kasuhapon.
Makahinayang man suboot an nasasayang na aldaw kan pagklase kan mga estudyante kun dae pa ili-lift an suspension.
Marahon an tinampo asin maliwanag an kapalibutan sa banwaan kan Pio Duran kun kaya pigngangalasan kaining kadakol an nadadagit sa resumption of classes.
Pigdugang pa kan opisyal na kinaipuhan nang ilift an suspenison nganing dae na maantala an mga nagkapirang aktibidad sa mga eskwelahan partikular na an graduation asin maisagibo ini sa nakatalang aldaw kan Department of Education.
Napapansin niya man mas gusto kaya kan nagkapirang estudyante ngunyan na panahon an suspension tulos kan mga klase dawa diit pa sanang pag-uuran an namamatean.
Nasa desisyon na man suboot kan magurang kun papalaugon ninda an saindang mga aki sa mga eskwelahan.
Pangapodan ni Ordoña na dae ipagkompara an kamugtakan kan panahon kan Legazpi City asin sa Pio Duran nin huli ta pwedeng mainit sa Pio duran asin mauran man sa ciudad nin Legazpi.
