Pigkokunsiderar kan Pilipinas an importasyon nin langis hali sa Russia bilang parte kan paghahanap nin bagong mapagkukuwaan nin fuel supply.
Segun sa Department of Foreign Affairs na obheto kan lakdang na ini na mapababa an lokal na presyo kan petrolyo asin masierto an bastanteng suplay.
Marurumduman na 98% kan krudo sa nacion an presenteng naghahali sa Middle East, na apektado kan kariribukan sa pagultangan kan Estados Unidos, Israel, asin Iran.
Pighihiling kan gobierno an Russia bilang potensyal na supplier ngani na mapababa an presyo kan petrolyo sa merkado.
Segun man ki Energy Secretary Sharon Garin na nakikipag koordinar na an Philippine National Oil Company (PNOC) sa Russian oil alagad dae pa natutukar an detalye kun gurano kadakol o an durasyon kan suplay.
Sa presente pighahalat pa an kasimbagan kan Russia.
Afuera digdi, nakikipagkoordinar man an nacion sa iba pang exporters siring kan Thailand, Japan, asin Singapore ngani na masierto an bastanteng suplay mantang nagtetenir na pabago-bago an presyo sa pang kinaban na merkado.
