LEGAZPI CITY- Pinahimutikan kan Philippine Institute of Volcanology and Seismology o Phivolcs an naglalakop sa social media na suboot pagputok kan bulkang Mayon sa Albay kasuudma.
Kun babalikan kaya, igwang sarong facebook page an nagpalakop nin impormasyon sa social media na suboot nagputok an nasambitang bulkan.
Segun kay Dr. Paul Alanis, an Resident volcanologist kan Phivolcs, piglinaw kaini na warang nangyaring ano man na pag-alburuto an bulkang Mayon.
Pinatanidan man kaini an publiko na dae basta basta magtubod sa mga pigpopost sa social media asin solamente maghiling sana sa saindang official page asin website para sa mga pigpapaluwas na abiso.
Dugang pa kaini na imantinir an pagtitiwala sa mga reputable media news site para sa mga lehitimong impormasyon.
Mientrastanto, pigklaro kaini na nakataas pa man giraray sa alert level 1 an bulkang Mayon asin pinagbabawal man liwat an pagpasiring sa 6km permanent danger zone kan bulkan.
Basado sa saindang monitoring sa nakalihis na 24 oras solamenteng 1 rockfall event asin 1 volcanic earthquake an nairehistro sa nasambitang bulkan.
Patanid man kan opisyal na ngunian na tag-uran, maging alerto an mga residentes na harani sa salog lalo na sa may Bulkang Mayon para makalikay sa mga posibleng lahar flow.
